Со огромна гордост објавуваме дека ЕДУФРОНТ, нашиот едукативен центар, ја освои престижната Butterfly Innovation Award за иновации во СТЕМ. Наградата беше доделена на третиот Регионален натпревар за иновации „Батерфлај“, којшто се одржа на 26 ноември во Подгорица, Црна Гора, за време на форумот организиран од Регионалниот совет за соработка (RCC).
ЕДУФРОНТ беше препознаен по својот иновативен модел на онлајн образование, кој преку интеграција на веб дизајн, програмирање и графички дизајн, ги воведува младите во СТЕМ дисциплините. Користејќи интерактивни алатки како Scratch, овозможуваме дури и на деца од осумгодишна возраст да ги развијат своите програмерски вештини. Нашата програма, која вклучува менторство во реално време од искусни предавачи, има за цел да ја зголеми дигиталната писменост на младите и да придонесе за економски развој на регионот.
На церемонијата присуствуваа нашата основачка Гордана Мишевска и Моника Златановска, долгогодишен член на тимот. Тие ја претставија визијата на ЕДУФРОНТ за обезбедување достапно образование за дигитални вештини за младите од Западен Балкан. Наградата е признание за нашата посветеност во градење на идни генерации кои ќе бидат спремни да се соочат со предизвиците на дигиталната економија.
Елда Калаја, шефица на Канцеларијата на генералниот секретаријат на RCC, ги поздрави победниците, истакнувајќи ја важноста на иновациите за регионот:
“Вечерва ги славиме визионерите кои нѐ инспирираат со нивната креативност и решителност. Наградите „Батерфлај“ се доказ за колективната генијалност на нашиот регион.”
Ова признание е само поттик да продолжиме со нашата мисија – премостување на јазот помеѓу образованието и дигиталната економија. Нашите образовни програми се создадени за да ги поттикнат младите да станат двигатели на промени и лидери на дигиталната трансформација.
За повеќе информации за нашите програми и активности, прочитајте на Дигитални патеки за деца на ЕДУФРОНТ.
Форумот „Батерфлај“ е водечки регионален настан организиран од RCC, кој се фокусира на поттикнување на соработка и иновации низ Западен Балкан. Наградата е финансирана од Европската унија, со цел поддршка на економскиот развој и дигиталната трансформација на регионот.
