Интервју со Моника Златановска – предавачка по Scratch програмирање
Со емпатија, цртачки блок и Scratch проекти што оживуваат идеи – Моника Златановска е лице кое ги отвора вратите кон програмирањето кај најмладите ученици. Од првиот Zoom час, таа знае како да внесе логика, игра и креативност во учењето. Во ова интервју ја запознаваме одблиску – преку нејзиниот пристап, навики, мотивации и примери што остануваат со децата многу подолго од обуката.
Како би се опишала себеси во три збора?
Ентузијастична, креативна, емпатична.
Кое хоби или интерес ти помага да се релаксираш и да се наполниш со енергија?
Цртање – на лист или платно, со музика или серија во позадина. Тоа ми е начин да се опуштам и целосно да се исклучам од обврските.
Како би ја опишала твојата професија и што најмногу те привлекува во неа?
Работата со деца никогаш не е монотона – секој час е нова приказна. Најмотивирачко е чувството кога во живо го гледаш нивниот напредок: од логика до конкретни идеи и решенија.
Кој дел од материјалот што го предаваш мислиш дека најмногу ги возбудува децата и зошто?
Најмногу ги возбудуваат Scratch мини-игрите. Кога ќе научат да комбинираат блокови и да оживуваат ликови, веднаш почнуваат да го приспособуваат проектот според сопствената имагинација. Тоа им дава чувство на слобода и оригиналност.
Како ги приспособуваш твоите предавања за различните нивоа на знаење кај децата? Како се справуваш со различната брзина на учење?
Kомбинирам:
- индивидуални задачи
- визуелни објаснувања
- групирање според ниво
- дополнителни предизвици за побрзите ученици
Така секој работи во свое темпо, без да чувствува притисок.
Дали имаш посебни техники за мотивација?
Да.
- Постојано давам пофалби за трудот и напредокот.
- Испраќаме кратки извештаи до родителите – на средина и крај од обуката.
- Користиме мини-проекти и креативни задачи кои ги прават децата мотивирани и активни.
Како успеваш да одржиш интерактивност на онлајн часовите преку Zoom? Кои алатки или методи ти помагаат за ова?
Scratch и Zoom – со јасен пристап „чекор по чекор“:
- Јас го споделувам примерот.
- Учениците го повторуваат и додаваат свој печат.
Користиме визуелни материјали и слобода за додавање слики, ликови, позадини. Ова одржува интеракција и ја поттикнува креативноста.
Што е она што го сметаш за најголем успех како предавач во Едуфронт?
Како екипа – добивме Butterfly Innovation Award за STEM иновации.
Како предавач – успех ми е кога детето ќе ја претвори својата идеја во реален Scratch проект и си замине со самодоверба и желба за нови знаења.
Дали дигиталните вештини што ги учат децата денес ќе им помогнат да се соочат со предизвиците на иднината? Како?
Апсолутно. Технологијата веќе е дел од секојдневието. Рано изложување на алатки и логика ги прави децата поспремни за напредни предизвици – и технички, и ментално.
Имаш ли личен пример што го потврдува тоа?
Да. Ученик што прво беше во Scratch обука, подоцна ми беше ученик по информатика во средно. Беше очигледно покомпетентен – не само технички, туку и во логичко размислување, увереност и брзина на учење.
Кој е највредниот совет што некогаш си го добил/а и кој ти помогнал во животот или кариерата?
„Секогаш гледај на ситуацијата од повеќе агли.“ Тоа ме учи на трпеливост и емпатија што е особено важно при работа со деца кои учат на различен начин и со различно темпо.
Кое е најголемото задоволство од работата со млади ученици и како тоа те инспирира?
Сè. Нивната искреност, енергија, моментите кога ќе „кликне“ некое ново знаење – тоа ме исполнува и ме инспирира секој ден. Тие ме потсетуваат дека секое дете има талент – само треба да му помогнеш да го пронајде.
